Oruc tutanların ürəyi daha sağlam olur

CƏMİYYƏT

534

04.03.2025, 18:00

Oruç tutmaq ürək sağlamlığına müsbət təsir göstərir.

Oxu24.com xəbər verir ki, tibb elmləri üzrə professor Merih Kutlunun açıqlamalarına görə oruc ürək sağlamlığına müsbət təsir göstərir.

Araşdırmalar göstərir ki, oruc tutan şəxslərdə pis xolesterol (LDL) azalır, yaxşı xolesterol (HDL) isə yüksəlir.

Həkim ürək xəstələrinin oruc tuta bilməsi məsələsində ümumi bir qayda olmadığını, hər xəstənin vəziyyətinin fərdi şəkildə qiymətləndirilməli olduğunu bildirib. Onun sözlərinə görə, diaqnoz, istifadə edilən dərmanlar və ac qalma müddəti bu qərarın verilməsində əsas rol oynayır.

Həkim ürək xəstələrinin oruc tutmazdan əvvəl mütləq həkimlə məsləhətləşməli olduqlarını vurğulayaraq, düzgün qidalanma və dərmanların vaxtında qəbul edilməsinin vacibliyini qeyd edib. O, orucun ürək sağlamlığına faydaları arasında iltihabı azaltdığını, insulin həssaslığını artırdığını və psixoloji rahatlıq verdiyini bildirib.

Bununla yanaşı, ağır ürək çatışmazlığı olan, son 1-2 ayda infarkt keçirmiş, stent taxılmış şəxslərin oruc tutmasının təhlükəli olduğunu deyən Kutlu yüksək təzyiqi olan xəstələrə də oruc tutmağı tövsiyə etmədiklərini bildirib.

O, iftarda və sahurda həddindən artıq yeməyin ürəyə əlavə yük yaratdığını, bunun da ürək döyüntüsünü artırdığını və qan təzyiqini yüksəltdiyini qeyd edib. Həkim xüsusilə Ramazan ayında iftardan sonra ürək tutmalarının daha çox qeydə alındığını xatırladaraq, yeməklərin iftarla sahur arasında bölünərək yeyilməsinin daha sağlam olduğunu bildirib.

Həkim yağlı, qızardılmış və yüksək karbonhidratlı qidalardan uzaq durmağı, lifli və proteinlə zəngin qidaların qəbul edilməsini tövsiyə edərək, ürək xəstələrinin oruc tutmazdan əvvəl həkim məsləhəti almasının vacibliyini vurğulayıb.

Həmçinin oxuyun